內地女老闆 哭出幾億銀

【明報專訊】流兩滴眼淚，就上得市？內地一財經周刊主任記者李德林，喺微博上爆料話，一內地公司女老闆為咗通過上市審批，對發審委員大灑眼淚，「證監會官員面對一個女強人突如其來嘅眼淚，眾人驚訝，頓生憐惜之心。毫無科技含量嘅一間公司喺眼淚轟炸之下，成功過關。」

證監會官員畀眼淚轟炸

消息一出，即刻畀網民轉發上千次，而且同時展開人肉搜索，究竟邊個靚女老闆一哭哭出上市傳奇。於是乎，近期由女當家領頭嘅幾間上市公司被一一點名。

A股上市門檻之高令眾英雄紛紛倒下，例如老字號「全聚德」1996年啟動上市計劃，用咗成11年先至成功。近年，大批內地企業紛紛轉投港股上市。今次呢名女老闆真係親身示範畀男子漢睇，要想上市，「男人有淚不輕彈」呢句說話就冇喺心中擺喇。你睇吓人哋一哭哭出幾億銀紙，成本效益無人可比。