「宇宙最強」做導演 幫肉蒲團老闆拍3D

【明報專訊】「宇宙最強」打到入上市公司？早輪靠一套《3D肉蒲團》熱炒過一排嘅中國3D數碼（8078），最近又有新搞作，打算搵「宇宙最強」甄子丹做導演拍新戲，咁啱公司呢個月頭先委任咗《3D肉蒲團》導演孫立基做執董，話唔埋如果甄子丹套新戲賣得，老闆蕭定一會叫埋佢入董事局齊齊做董事喎。

今年4月上畫嘅《3D肉蒲團》，打正招牌係全世界第一套3D三級片，雖然後尾口碑唔係太好，仲畀一班高登仔猛唱無料到，但票房照樣過千萬，公司股價仲熱炒咗一段時間，不過到咗家都可謂打回原形，噚日收市價得返0.011元，恐怕就嚟連「仙股」個價位都守唔住，咁叫咩好呢？小琴查過，原來10分1仙即係文，啊，咁叫「文股」啦，真係聽都未聽過。

蕭定一蕭少公子向來多計，唔知係咪見個股價唔掂，即時有新動作，請咗甄子丹嚟自導自演佢套新戲動作片《3D急凍奇俠》，雖然呢次唔係三級片，但有甄子丹喺度，小琴心諗都應該有啲吸引力，唔知佢個拳頭會唔會好立體咁成個打埋嚟呢？

肉蒲團導演做執董

而最令小琴好奇嘅，係《3D肉蒲團》導演孫立基啱啱先畀人委任咗做執董，咁莫非甄子丹遲吓都會入董事局，實行打功夫打到入上市公司？小琴噚日打咗幾次電話畀蕭少公子，可惜最後佢都無聽，暫時問唔到佢嘞。

email:piano@mingpao.com