朱太搞長者盆菜宴 筵開180圍

【明報專訊】喺金融圈出晒名長袖善舞嘅金利豐金融（1031）老闆娘朱太朱李月華，不嬲都好積極做善事，好似佢喺鴨脷洲搞嘅長者宴咁，每年都請一班公公婆婆食盆菜，規模仲愈搞愈大，嚟緊周六（19日）就會搞到第九屆，筵開180圍，朱太話最緊要一班公公婆婆食得開心，使幾多錢都無所謂！

朱太一向都係大忙人，雖然佢有陣時無辦法親身出席慈善活動，但做善事時依然出錢出力，除咗係做保良局總理之外，仲喺鴨脷洲唔少公益組織有職務。

對於呢個鴨脷洲長者宴，朱太就一直都盡力抽時間親自出席，除咗陪啲公公婆婆傾偈，仲會封吓利市畀佢哋，等佢哋有錢買吓嘢食咁。

小琴早排就同朱太傾開偈，笑笑口問吓佢會唔會請啲明星去表演吓，佢就好認真咁話好多公公婆婆都唔係好識而家啲明星，但就諗吓會唔會請盧海鵬同朱咪咪呢啲前輩明星，等啲公公婆婆開心吓，佢仲話今年會開夠180圍，使幾多錢唔緊要，最緊要佢哋開心！

「使幾多錢唔緊要」

講返點解要搞長者宴，朱太就話佢其實喺鴨脷洲長大，搞長者宴一方面可以吓公公婆婆開心，其次亦可以宣傳吓鴨脷洲，一舉兩得，何樂而不為呢？

email:piano@mingpao.com