道指亞洲版 港8藍籌入圍

【明報專訊】道瓊斯指數殺入亞洲！大家喺新聞成日聽到美股嘅道指上上落落，以後大家聽到嘅道指可能係講亞洲股市。道瓊斯指數噚日就成立最新道瓊斯亞洲指數，同傳統嘅道指一樣，只會網羅30隻具有代表性嘅亞洲藍籌，香港就有8隻藍籌入圍，包括工行（1398）、中石油（0857）及長實（0001）等，加埋權重達兩成。

網羅30隻亞股 港股佔兩成權重

唔經唔覺道指已經有成百年的歷史，貴為世界最長壽嘅指數之一，道瓊斯指數總編輯及執行董事John Prestbo話，好多投資者都希望公司喺亞洲同埋歐洲，推出類似美國道指嘅指數，所以回應大家要求。Prestbo又講，雖然愈來愈多指數誕生，但現時美國不少投資者都係以指數為依歸的被動投資者，所以指數有一定參考性，無話嫌多嘅。

Prestbo講，道指特別之處係只會選擇30隻具代表性的藍籌，不同於標普500指數，未必有經過量化的準則，「因為只得30隻股份，所以很多時候在選擇股份時面對很多問題，有時候主觀決定，未必有解釋。」