內地樓價高企 貪官「記一功」

【明報專訊】溫總同內地樓市「八年抗戰」，今年終於有希望將樓價壓低，但係佢可能估唔到，其實內地樓價居高不下，除咗投機因素之外，仲可能有個非主流原因，就係「貪官愛買樓」。

貪600萬美金 京津買37套房

小琴唔係「山草藥」噏得就噏，早兩日內地審咗單貪污案，一個擁有經濟學博士頭銜既青島遠洋運輸有限公司副總經理宋軍，因為貪污600萬美金被捕，檢方仲查出，呢位國企副總將大部分貪款用嚟買樓，喺北京同天津等地擁有37套物業，其中淨係北京就有27套，唔止呢位貪官愛買樓，上兩個月山西省蒲縣原煤炭局長郝鵬俊涉貪落馬，同樣被揭發竟然響北京、海南等地有35套物業。再睇返呢幾年，基本上出事嘅貪官都係物業不少，情婦不少，佢哋咁樣買樓法，又點會唔助長樓價呢？

貪官愛買樓，一方面可能係實際需要，金屋藏嬌也；另一方面亦可能係地位嘅象徵，手上愈多樓就愈係成功嘅「指標」。

另一方面，貪款得來很易，令貪官唔需要在乎樓價高低，可以窮奢極侈買貴樓，住豪宅；而且更大可能係，買樓可以保值，可以投資，你話樓價好嗰陣，一買一賣，光明正大，賺錢都賺得「名副其實」啦。難怪得上邊提到嗰位國企副總宋軍，就堅稱嗰37套物業只係幫朋友理財投資囉。

所以話呢，貪官買樓，既敗官風，又推高樓價，國家要調控樓市，不妨考慮埋加強打擊貪污，咁就一石二鳥，更加大快人心。

email:piano@mingpao.com