內地報道：周大福產品有瑕疵

【明報專訊】唔少人都知道新世界（0017）主席鄭裕彤係做珠寶起家，佢旗下嘅周大福一直被視為中港地區珠寶零售業龍頭，產品不嬲有保證，最近仲傳出公司計劃年底喺香港上市。不過，尋日就有內地傳媒報道話佢哋部分產品甩色或者斷裂，為生意為上市，周大福似乎要小心啲處理喎。

手鏈斷開鑽戒甩色

尋日新華網有段報道，話長沙有消費者買咗隻黃金結婚戒指，戴咗4個月就斷裂，佛山亦都有人買咗條黃金手鏈，戴咗不夠一個星期都斷埋，另外有位小姐買咗隻鑽石戒指，戴咗10日唔夠亦都開始甩色，而呢啲產品清一色係喺周大福內地分店買嘅。

如果要選香港人心目中最想佢上市嘅香港名牌，小琴覺得周大福應該都可以名列頭十位之一，不過品牌呢樣嘢好脆弱，好似蒙牛（2319）同霸王（1338）有辦你睇。

睇番周大福喺呢件事上面處理都算唔錯，佢哋見到有客戶喺微博投訴，即時關注投訴同接收番有問題產品去做維修，總算解決咗件事。小琴噚日打咗畀周大福香港公關，佢哋話因為呢件事係發生喺大陸，佢哋需要轉交畀大陸同事嚟回應，最後雖然趕唔切回覆，但就全程保持禮貌，值得一讚。