抽水榜富豪多在港撳錢

【明報專訊】「企業家套現後才算真正的富豪」，《胡潤百富榜》創辦人兼首席調研員胡潤嘅呢一句說話，不可謂不精警。呢個集中關注中國富豪嘅排行榜，噚日就別出心裁，搞咗個「套現富豪榜」，專幫民企老闆計算佢哋從市場抽咗幾多水。有趣嘅係，喺呢個排行榜中排名靠前嘅人士，大部分都係香港上市公司嘅創辦人或主要股東。

當中比較出名嘅包括民生銀行（1988）嘅史玉柱、熔盛重工（1101）嘅張志熔、雨潤（1068）嘅祝義材、恒大（3333）嘅許家印、騰訊（0700）嘅馬化騰、霸王（1338）嘅陳啓源、味千（0538）嘅潘慰。而所謂嘅抽水，主要即係指減持佢哋公司嘅持股，或者憑佢哋喺公司的股權收取巨額股息。

胡潤：套現才算真正富豪

至於整個榜中抽水最多嘅人士陳文沛，雖然同香港無乜直接關係，但佢抽水嘅來源，就又係同香港上市公司有關——佢係因為旗下嘅汽車經銷業整體賣盤畀正通汽車（1728），而套得55億元（人民幣．下同），當中淨賺45億元。唔講唔覺，香港上市公司真係幾似呢班富豪嘅提款機。

排行榜指出，企業家套現，雖然大多數喺公司上市3年後開始。但當中都不乏有特例，如霸王嘅陳啟源夫婦和佳兆業嘅郭氏三兄弟，就喺公司上市半年後、禁售期一到就出貨。

而翻查歷年嘅抽水紀錄，身陷囹圄嘅國美（0493）大股東黃光裕就係累計套現最多嘅富豪，累計達138億元。

email:piano@mingpao.com