俄鋁邀「金磚四國」之父 周五科大講環球經濟

【明報專訊】俄鋁（0486）同香港科技大學聯手搞嘅校長論壇，又有新搞作。繼今年3月邀得舊年諾貝爾經濟學獎得主皮薩里德斯（Christopher Pissarides）講勞動力市場，呢個星期五高盛資產管理公司主席、即係首先提出「金磚四國」概念（BRIC，即巴西、俄羅斯、印度及中國，取各自英文名稱首字母組成）嘅Jim O'Neill，亦將現身科大，分享佢對環球經濟動態，同埋現時金融危機的看法。

「金磚四國」概念10周年

話時話，今年已係「金磚四國」概念誕生10周年。作為呢個講法嘅原創者，O'Neill嘅演講自然離唔開呢個主題。據小琴了解，今次係呢位大名鼎鼎嘅經濟學家首次喺香港公開演講，佢除咗演講，亦會同科大校長陳繁昌教授對談，同埋回答現場提問。