港失寵 內地客目的地三甲不入

【明報專訊】家正值「十一黃金周」，小琴出街都見到周圍人山人海，大部分人都係操流利普通話，來自內地嘅旅客真係唔少㗎，本港零售商都因此賺到盤滿鉢滿，不過最近就有調查發現，香港喺內地人心目中嘅地位，出現大危機，內地人首選心水旅遊目的地，香港三甲不入，較前年排首位大倒退，香港旅遊業真係唔好安於現狀，要諗諗計啦。

噚日Visa發表咗一份「Visa旅遊展望調查」，3月訪問咗11,260位來自23個地區嘅受訪者，其中發現，內地客未來2年首選出遊地，三甲依次為澳洲、日本同埋法國，3個都係海外地區，但我哋以為係內地旅客購物勝地嘅香港，就三甲不入，換言之，未來2年內地人諗起要去旅行，都未必會揀香港作為目的地。小琴睇番前幾年嘅調查結果，去年香港喺內地旅客心目中排第三，前年就排第一，所以香港真係一年比一年退步，反而澳洲同日本，就連續兩年都係排首兩名。

辛瑋達︰內地旅客會繼續來港

不過，Visa署理總經理辛瑋達就話，今年調查結果雖然顯示，香港喺內地客心目中已經跌出三甲，但佢相信內地旅客都會繼續來港，原因係未來2年內地客平均會出埠7次，其中總有1、2次會嚟香港，由於近年內地都開放咗，令到唔少內地旅客都希望去海外遠啲嘅地方咁話。

另外，調查亦發現，雖然今年日本經歷地震同海嘯衝擊，但係都無損旅客選擇去日本旅遊，仍然係香港、韓國、新加坡等地嘅旅遊首選，希望香港都學吓人哋，唔好一年退步過一年啦。

email:piano@mingpao.com