新聞類別
財經
詳情#
【明報專訊】近呢幾年香港金融市場愈來愈興旺，連周邊行業都被帶旺埋，好似財經公關咁就愈開愈多，不過近排個市開始轉淡，加上競爭對手多咗，正路就梗係要提高服務質素，但有時爭起生意都真係要各出其謀。
有老友最近同小琴食開飯，話佢最近參與一間上市公司嘅慶祝晚宴，負責之公關公司竟然向在場賓客每人送一條Hermes領呔。小琴身為時尚女性，雖然好少買呔，但粗略估計條呔售價都要3000蚊以上，即係話如果在場有100名賓客，公關就至少派咗30萬出去！老友笑笑口話唔係好敢收，皆因驚老廉查喎。
其實財經公關為咗爭生意，少不免要同各方人士飲茶灌水搞好關係，但係似乎就開始出現亂象，有啲送上各種名貴禮物，有啲話幫你炒高股價，相反基本責任好似公關計劃，同媒體聯繫解釋各種問題就愈做愈差，是否有點本末倒置呢？
回應 (0)
