李國寶心繫東亞 三年又三年

【明報專訊】「一開始話做3年，3年之後又3年！」呢句係出自電影《無間道》入面梁朝偉嘅經典對白，睇嚟都係東亞（0023）主席兼行政總裁李國寶嘅心聲，本報率先披露「寶哥哥」已落實第二次留任，東亞作出自願性通告，原來「寶哥哥」仲要做多3年，即去到2015年先退休，即是要到76歲先退下來，小琴都敬佩佢呢份魄力！

「寶哥哥」原先2009年決定再任3年，原定下年3月退休，不過佢心繫東亞，歐美外圍立立亂，又自覺身體條件不俗，決定再續任。「寶哥哥」1969年加入東亞，1981年升任行政總裁，繼而喺1997年獲委任為主席，認真係由上至下對東亞瞭如指掌，兩位公子亦已基本掌握銀行業務，第時接班難度不大。

另一個華資大班，永亨（0302）董事長兼行政總裁馮鈺斌，2010年年報顯示，佢已年屆63歲，似乎亦要諗定接任安排喎。