國際板益紅籌 唔益跨國企業

【明報專訊】內地講得甚囂塵上嘅國際板，仲未有推出時間表，但市場一直傳言多多，而且普遍相信國際板係為外國公司提供到內地圈錢嘅渠道；之不過，上交所發行上市部總監巢克儉早兩日出席上海一個高峰會時就話大家誤會晒，實情最適合利用國際板上市嘅應該係現有400間紅籌公司，因為可以藉此回歸祖國，佢仲透露，中移動（0941）好有可能係首批響國際板出現嘅紅籌股。

幫海外註冊紅籌「變相回歸」

巢克儉話，佢認為啲人覺得外企借國際板圈錢真係諗錯晒，事關要融資，啲公司可以有唔同渠道，唔需要去國際板上市，令股權稀釋，如果真係要咁做，最多都係想擴大響內地知名度而非為錢。相反，佢就相信嗰啲因為喺海外註冊而無法回歸A股嘅紅籌股，可以好好利用國際板平台嚟變相回歸，重投祖國懷抱。