李稻葵晉身官場

【明報專訊】學而優則仕，一言一行都備受財經媒體關注嘅人行顧問李稻葵，正式加入「學者型官員」行列，掛職北京中關村科技園區管理委員會副主任，官至副局級。

過往但凡李稻葵出鏡，都離唔開貨幣政策。今年年屆47歲嘅李副主任，喺官場唔算特別後生，任期到出年底，應該係小試牛刀。而李副主任嘅落腳點中關村管委會，係北京市政府底下一個附屬機構，如果單睇個名會以為係做啲審批事務，但李副主任就唔使理呢啲濕碎嘢。因為管委會嘅工作只係研究國家政策，爭取政策投向高新產業。

而呢個掛職都有一番講究。所謂「掛職鍛煉」，即係將一班非中共黨員嘅學者、院士納入麾下。學者型官員專業性強又有理想，對國家對個人都係一樁美事。小琴在此預祝李副主任平步青雲官階路，仕途盡錦繡。