啤酒爆樽 燕京賴「發展中國家」

【明報專訊】內地奇事一向無數，山東電視台早排報道，北控（0392）旗下嘅燕京啤酒酒樽發生爆裂事件，原來係呢個酒樽已經用咗12年，無跟足標準規定係2年內退役，頂唔住內在壓力爆炸。正當大家爭相去燕京啤酒有關負責人追究時，燕啤發言仁兄講出一句語出驚人嘅解釋﹕「這個辦不到，咱是發展中國家。」

小琴認為呢句「這個辦不到，咱是發展中國家」，幾有深度，引發人深思，未來可能是解釋祖國國情嘅最佳法寶，好有潛質繼鐵路部前發言人嘅名言「反正我信了」，成為另一句網絡潮語。

「啤酒樽只用兩年辦不到」

呢位負責人的確係語不驚人死不休，佢仲補充話，「國家建議啤酒樽用兩年，這個咱辦不到，可能美國能做得到。」相信佢呢番說話，已經得罪不少愛國憤青，一班愛國憤青眼見中國已抬起頭，全世界都奢望中國拯救全球經濟，點知竟然有個中國人自己睇唔起自己，話美國人做到，中國人做唔到！