新聞類別
財經
詳情#
【明報專訊】恒隆地產（0101）主席陳啟宗一向鬼咁有性格，正當所有公司都講緊加強投資者關係嘅時候，阿朗尼陳就叫啲股東沽貨悉隨尊便，真係同星爺電影《食神》入面嘅食神一樣，估你唔到呀！話說恒隆噚日出年報，小琴當然第一時間拜讀朗尼陳今年又有咩偉論，近年喜歡講大陸地產多過香港地產嘅佢，就喺主席報告度話未來一兩年喺內地買地嘅可能性唔高。
母公司會趁低吸
咦？恒隆近年最鍾意將大陸發展宏圖掛喺嘴邊，突然又話唔買地？朗尼陳當然明白市場人士諗乜，佢亦都喺年報自問自答，話有啲人知道佢嘅諗法之後，可能會沽售恒隆嘅股票，而朗尼陳對此嘅回應「當然是：『隨便吧！』」。佢仲話，無論如何公司無法阻止這些行為，「况且我們實在不介意，因為當本公司的股價跌至某些價位時，母公司恒隆集團便會購入」。擺明居馬叫股東隨便沽貨，等母公司低吸，真係型喎！
不過咁，雖然朗尼陳把口係招積啲，其實佢對員工真係唔錯，好似恒隆新董事總經理陳南祿，朗尼陳除咗見一次（傳媒）讚一次外，舊年畀阿菲臘嘅董事酬金連埋花紅有成2650萬，而且菲臘係舊年7月中先加盟，比起佢喺太古（0019）09年全年嘅人工1422萬高一大截，好明顯菲臘搵到頭好住家喇！
email: piano@mingpao.com
回應 (0)
