定期賣地 戇居兼死板

【明報專訊】香港有沒有地產霸權？陸東如此回應，「何謂地產霸權？係咪定義地產商嘅影響力，大到可以影響香港政府一切？政府現時弱勢，其實你可以，長毛也可以，只要夠大聲，人夠多，都可以影響到佢！」

那是否存在資本壟斷？「冇！如果你係銀行，會唔會淨係借錢畀李嘉誠做生意 ？」

添馬艦建政府總部 浪費靚地

陸東續稱，地是要用錢投回來的，「人哋百佳、惠康（兩大連鎖超市），都係正正經經地租舖做生意。」他對時下香港的政治文化，有點不以為然，「香港今時今日嘅社會文化，可以不用講道理，人多聲大『出嚟嘈』就可以。呢個世界幾時都係窮人多，那些『抽水議員』只要出來講﹕『開倉派米、食咗先講』，就一定會有好多人支持。」

不過，陸東也認為香港的土地政策有不妥之處。「從政嘅人如果欠缺前瞻性，必定累死香港！最明顯例子，就係將中環添馬艦地王，用作興建政府總部。全世界國家嘅政府總部，都唔會在市中心最值錢嘅地段興建。如果政府將添馬艦地王劃分成幾個地塊，並進行公開招標，讓長實（0001）、新鴻基地產（0016），或太古（0019）等大型發展商參與競投，你話可以為庫房帶來幾多收入？」

「相反，政府總部應該在九龍城興建，從而帶動啟德郵輪碼頭嘅發展。」

中環街市資源錯配 間接令租金暴升

除添馬艦地王外，陸認為中環街市亦是資源錯配的「經典例子」。「保育中環街市來養魚、養白鴿？如果用作興建全新商廈，IFC（國際金融中心）現時嘅租金就唔使搞到成200元一呎。」

此外，有見本港樓價長期居高不下，特區政府近期積極主動推地拍賣，陸東認為﹕「定期賣地制度戇居兼死板！相反，勾地制度只需加以靈活化、優化和增加透明便行。」