陸東新書 自爆追女4招

【明報專訊】出身銀行，其後自立門戶開基金公司嘅陸東，出名靚仔兼有型，所以小琴同埋唔少女同事都係佢嘅粉絲。陸東噚日出新書《繼續傲行》，小琴喺書局見到，即時買番本返公司同一眾姐妹分享，大家估吓，本書邊part最吸引到小琴注意？當然係陸東講自己嘅感情世界嗰章啦！

切忌猥瑣 初約會咪手多多

陸東喺書中提到，好早就到外國讀書，又唔怕醜，大佢三幾年嘅女仔都夠膽追，每每都得心應手，全憑追女4招：首先，要有人格，切忌猥猥瑣瑣，更忌第一次出街便手多多；第二，要隨和；第三，要細心；第四，要有幽默感。原來陸東當年喺加拿大讀中學，有個貼上汽車嘅標語比賽，當時陸東嘅作品就係﹕If you are rich, I am single（如果你有錢，我便是獨身），係咪夠晒幽默呢，結果攞咗冠軍，標語更製成商品大賣，隨街可見。佢話追女雖然叻，但係就好專一，拍親拖都至少1年，雙方唔夾至分手，最後回港在29歲娶到家個老婆，一直相愛，佢話娶到呢個老婆係「the best thing that has ever happened to me in my life（一生中最美的事）」，真係「冧」死人。