和廣北：人幣業務政策主導

【明報專訊】香港三大發鈔銀行巨頭，近日喺倫敦推廣人仔業務，大家未必有機會目睹，但小琴就親眼喺倫敦見識到。貿發局喺當地搞嘅人民幣業務論壇，搵齊匯豐、中銀同渣打話事人到場。中銀香港（2388）副董事長兼總裁和廣北就喺匯豐及渣打兩家對手面前，向一班英國聽眾介紹中銀嘅人民幣結算業務係「阿爺」主導，無銀行咁易搶到生意咁話，又話喺中銀開人民幣戶口，係最直接進入內地人民幣市場嘅途徑。

人民幣業務係各家必爭之地，上年香港一眾銀行就「詐型」中銀享有獨家人民幣結算行地位，又話要將人民幣頭寸放晒喺中銀有好大風險，於是乎呢班銀行嘅人民幣戶口，後來就拆開咗託管同清算戶口。曾喺倫敦工作多年嘅和總喺論壇上用英文話：「我們的人民幣清算系統，競爭對手都想爭奪這塊業務，但這項業務屬於很高層次的政策主導。」講明畀大家知中銀嘅優勢。

呢場論壇由金管局總裁陳德霖親自主持，同場仲有匯豐香港新一姐、香港區總裁馮婉眉，而佢就比較低調，無力誇談匯豐有咩人民幣強項，只係講佢哋可以有咩業務提供到畀客戶。

論壇後唔少參加者都圍住渣打香港行政總裁洪丕正，問佢發點心債嘅嘢，今時今日喺歐洲大家最關心嘅莫過於「撲水」，相信香港嘅點心債市場前途無限。

歐企撲水發點心債

同場嘅港交所（0388）市推廣部主管藍博文（Eric Landheer）話，早在兩、三年前，佢一出糧就已經將一大部分轉做人民幣存款，仲好得戚地話平均利息回報有1.3厘，但佢都話，收息唔係佢嘅目標，最緊要係等升值。小琴就覺得，人民幣息率顯著上升，都係呢1年多嘅事，佢不嬲都收咁高息，就一定係大戶喇！

email: piano@mingpao.com