【蘋果專訪】萬人迷碧咸唔止要做「買樓慈父」咁簡單

【蘋果日報】「萬人迷」碧咸（David Beckham）雖然年屆42歲之齡，但身材依然未見走樣，不時亂入囝囝Instagram鬥型。作為友邦保險全球大使，碧咸今日赴港親述凍齡秘密，順便大談湊仔經。
要幫友邦推廣健康，碧咸坦言，自己保持健康的動力一直源自家庭。「我嘅日常生活就係一班囝囡，要湊四個其實都唔少野，我會親自煮佢地中意食嘅野、送佢地返學、同佢地去公園玩、放下狗，總之佢地去邊我就跟去邊。」
「囝囡令我對生活保持熱誠，作為爸爸，我希望囝囡以我為正確榜樣，俾佢地睇到Daddy踢波踢咗22年，退咗休後依然係咁健康、依然勤力做運動，令佢地將來都可以保持健康習慣。」
碧咸指，即使退休後，自己仍有保持踩單車、打拳等運動習慣，而且飲食要節制，最重要心境上要保持年輕。「早餐我都係烚下蛋，食下麥皮、生果。其實又唔洗戒晒所有零食，間唔時食下係幾開心，好似班細路梗係中意食糖、食朱古力啦，但佢地知道食得太多就唔好，而且零食都可以係生果乾、乾果啫。」
雖然貴為超級巨星，但碧咸坦言，自己只是一個普通父親。「其實好簡單，可以嘅話一齊行返學、放狗跑下，做少少野已經可以有好大改變。」碧咸大仔Brooklyn剛滿18歲，早前遠赴紐約讀攝影，碧咸縱然不捨，亦一於做「跟得爸爸」陪囝囝準備升學。
「之後要同Brooklyn再好似之前咁成日一齊運動，當然係有難度，但佢就算無爸爸媽媽係身邊，都仲係keep住每日做運動、食得健康，記得我對佢嘅教導喎。呢樣就已經係我同佢過去相處18年來嘅回報。」
碧咸出名愛錫子女，講到湊仔經更是滔滔不絕。近年香港亦有不少「慈父」，幫囝囡俾首期是常識，最好甚至成層送出。對於「慈父」做法，碧咸坦言，作為父母當然不能將囝囡放手不理，但所謂支持不限於物質上。
「細路就係需要關心，需要知道你愛佢，最重要係佢地需要你嘅時候，你能夠企係佢地身邊。佢地做得好，你要同佢慶祝；佢地跌低，你就要撐返佢起身」。