陳華敏「態度唔好」 被踢出富貴鳥

【明報專訊】前財爺曾俊華上年一句「You always agree with your boss」，引起無數港人共鳴，唔聽老闆支笛，真係隨時被DQ。就好似喺內地搞衫鞋生意嘅民企富貴鳥（1819）噚日宣布，暫停公司獨立非執董陳華敏嘅董事職務，原因係：「態度唔好」！


富貴鳥話今次停職，係考慮到陳華敏回應公司對於股份復牌問題時嘅態度，覺得佢作為董事冇提供任何具建設性嘅資料證實佢嘅觀點，仲指責佢「不合理地不合作」，唔能夠客觀咁為公司利益作決定。話說其實呢間公司由去年9月開始停牌，其間因為被核數師質疑財務問題而炒咗人，冇幾耐CFO就跳咗船，到家仲未復到牌。之前仲有小股東要求公司罷免陳華敏同另一位獨董龍小寧，當時龍小寧回應傳媒查詢時仲好有個性咁話：「無可奉告！」


[小琴密語]