兩公婆兩隻餐飲股 「獨立發展」

【明報專訊】創業板不嬲都受餐飲集團歡迎，最新有一間叫佳民嘅公司遞交上市申請，佢嘅主要股東係黃佩茵，而佢老公羅揚傑都係一間創板上市餐飲股Classified Group （8232）嘅股東，兩公婆分別係兩間餐飲股嘅主要股東，對啲小股東嚟講，好似唔係好fair喎！

佳民喺上市申請文件似乎早有準備，公司就列咗好幾點講佳民同Classified Group係獨立發展、管理同經營。其中一個理據係，羅揚傑同老婆黃佩茵未結婚嘅時候，就已經創辦Classified Group，當時係2006年，而兩個人喺2011年9月先結婚，雙方都無持有對方公司嘅任何股權。睇到呢度，小琴心諗，兩公婆幾時搞間餐廳、幾時結婚，同兩間公司係咪獨立經營有咩關係呢？以前嘅嘢唔講，家下兩個都結咗婚，唔通對方從來對工作嘅事隻字不提？係嘅小琴真係要寫個「服」字！


[小琴密語]