立會補選民協內部爭逐 何啟明讓路馮檢基

【明報專訊】青年新政游蕙禎及梁頌恆嘅議席懸空至今，雖然未知幾時補選，但各黨已蠢蠢欲動，尤其喺立法會無議席嘅民協，對九龍西席位虎視眈眈。老將馮檢基同區議員何啟明早排都向黨友表明決心，想代表民協出選，本身民協計劃下月搞初選。令人大跌眼鏡嘅係，民協初選噚日提名期最後一日，何啟明喺facebook宣布，自己唔會參加黨內初選，希望維護黨內團結為先，希望大家諒解。


何啟明話，自己唔認同中委會提出嘅初選機制，認為自己繼續出選或會分裂民協，唔想見到咁多爭拗。今次民協初選機制要過三關，先有提名期，然後由24個民協黨員選出一個候選人，再經三分之二信任票通過，認真唔易。家只得馮檢基報名，何啟明話會支持基哥出選。何強調無考慮過退黨自己參選。


有民協領導層話，對何退出初選覺得詫異，話佢一直有意參加，選情亦不差。何啟明自己都話可惜，話本來希望透過今次選舉呈現民協新形象。