宅女愛打機 容海恩真名玩手遊

【明報專訊】新民黨立法會議員容海恩（Eunice）嘅口才大家都見識過，原來佢天性「宅女」，私底下好鍾意打機。最近Eunice迷上一個好出名嘅手遊「Clash Royale（部落衝突）」，仲唔驚現真身，拎真名出嚟行走江湖，佢都話，有網民向佢親自求證，係咪「真．容海恩」。Emily望過，Eunice喺個遊戲升級得好快，喺一個叫「港男港女聯盟」團隊中做埋副首領，唔知有無網民同佢交過手？
雖然係機迷，不過Eunice先旨聲明，自己從來無喺議會廳開會時玩過，佢仲堅稱唔會畀錢玩，話因為呢啲嘢真係返唔到轉頭㗎。其實除咗Eunice之外，議會內香港眾志羅冠聰都係出咗名鍾意打機，仲有「電競聰」嘅花名。唔知兩個人之後係咪都可以跨黨派聯手，推動香港嘅電競產業發展呢？