賀仙姐90大壽 中大圖書館辦任白展

【明報專訊】帝女花、紫釵記、牡丹亭驚夢……多套膾炙人口嘅經典粵劇係唔少市民嘅集體回憶，為咗祝賀白雪仙今年90歲大壽，中大由呢個月14號至到7月31號，會喺中大圖書館展覽廳舉辦「九十風華帝女花——香港中文大學圖書館任白珍藏展」。


展出極罕見劇團開山泥印本

今次展覽展出「任白慈善基金」捐贈畀中大嘅多項珍貴藏品，當中包括由任劍輝同白雪仙所創立「仙鳳鳴劇團」歷屆演出嘅劇照、劇本、生活照等，當中包括極為難得一見嘅劇團開山泥印本，因為泥印本只能印製10幾份，係台柱、打鑼、提場等主要工作人員嘅專用劇本，同其他因應演出需要增加或者刪減嘅演出本比較，泥印本更加「原汁原味」。


至於「仙鳳鳴劇團」歷屆演出嘅黑白劇照都公開比市民欣賞，當中包括白雪仙當年為咗演出《白蛇新傳》而苦練武打功架嘅圖片，令市民可以一邊欣賞展覽，一邊追隨「仙鳳鳴劇團」嘅步迹，回顧香港粵劇嘅發展史，細味粵劇嘅種種風華同內涵。今次展覽免費開放公眾參觀，喺展覽期間中大亦會舉辦相關講座，令市民加深對粵劇嘅認識。圖書館開放時間，可瀏覽www.lib.cuhk.edu.hk/tc或致電3943 8740。