去年201萬台灣人訪港 七成重遊

【明報專訊】香港人鍾意去台灣旅遊，仲有後生仔話想移民台灣。其實，唔少台灣人亦鍾意嚟香港玩，旅發局就話，香港係台灣人最愛嘅旅遊城市之一，舊年台灣有201萬人次訪港，其中有70%係重遊，而旅遊局亦向台灣旅客推介中環舊城路線，邀請旅客重新認識香港。


據中央社報道，台灣旅客訪港平均停留2.6天，有七成係重遊，其中更有四成台灣客造訪香港超過4次以上。為咗吸引台灣旅客，旅發局近期邀請喺香港嘅台灣人帶路，包括嫁到香港嘅台灣博客，推薦女孩子著旗袍漫步舊中環，喺石板街、石牆樹前影相。


好多旅客出到去旅行，都鍾意喺網上打卡「到此一遊」。旅遊網Tripadvisor就推出首個流動「Check-in」指數，記錄智能手機GPS定位，統計遊客最受歡迎打卡熱點，話香港女人街、香港迪士尼樂園同山頂，都係遊客到訪熱點。