為警裝隨身攝錄機駁火 周浩鼎涂謹申互批「心裏有鬼」

【明報專訊】保安局早前透露，警方計劃喺2021年全面為前線軍裝警員配備隨身攝錄機，支持建議嘅民建聯議員周浩鼎（Holden），同對建議有保留嘅民主黨議員涂謹申，近日就互相批評對方「心裏有鬼」，究竟所為何事呢？

Holden日前喺facebook發文，並上載自己喺立法會委員會發言片段，話警員配備隨身攝錄機後，一旦有示威衝突發生，攝錄機可以令雙方克制，形容「攝錄機非常公道，有片有真相」，唔存在對示威者不利。Holden認為「反對派」大力反對，原因係心裏有鬼。


阿涂噚日就喺fb反駁，強調自己同其他民主派議員並無大力反對建議，佢哋要求嘅係攝錄機唔停機直至返回警署，並將影片副本交畀被錄影人士。


阿涂形容，Holden同建制派無勇氣面對香港眾志羅冠聰提出嘅「要求公開警方使用攝錄機守則」動議，先係真正心裏有鬼喎。