直擊神功戲後台 EQ訪問秋香姐

【明報專訊】每年天后誕前後，香港唔少地方都有「神功戲」演出，民建聯立法會議員葛珮帆（EQ）噚日喺facebook上載短片，帶大家參觀坑口一場神功戲嘅後台，仲訪問台前幕後人員，打探鮮為人知嘅戲班習俗。原來戲班人員要向華光師傅像裝香，以求一切順利，而如果戲棚場地之前從未使用過，戲班就要舉行「打貓」（祭白虎）儀式，由演員扮演白虎並被制服，掃走邪氣。


呢場神功戲戲名為《三笑姻緣》，講述明代才子唐伯虎追求侍女秋香嘅故事，飾演秋香嘅女演員同EQ講，花旦化妝同整頭髮，已經要用一個鐘時間，相反著衫就好快，因為有人幫手，通常幾分鐘搞掂。近期天氣開始熱，不過飾演唐伯虎嘅男演員就話，佢哋嘅妝唔會溶，因為係防水嘅。EQ用咗15分鐘直擊幕後實况，佢形容神功戲係香港獨特文化，希望有多啲人欣賞。