廣告聘老人保母 飲茶傾偈薪金8000

【明報專訊】近日網上流傳一則招聘廣告，有僱主話想聘請「老人褓母」，同一個坐輪椅嘅94歲長者飲茶同傾偈，一星期做6日、「早上8時至1時」，薪金8000元，無寫明要有咩資歷要求。Emily同事噚日打去廣告上嘅電話了解，對方話長者同家人同住，但因為屋企人唔可以全天候陪伴，所以希望聘請保母照顧長者。


話幾十人有意應徵

負責請人嘅呂小姐回覆查詢時話，廣告中提到嘅長者與家人同住，屋企已經請咗菲傭，但菲傭同長者比較難溝通，所以希望多請一個言語上較易溝通嘅保母照顧老人家。呂小姐話應徵者需同老人家多啲講嘢，或同佢讀報紙，希望可防止老人家患上腦退化症。佢話曾經向中介人查詢，一般保母時薪約為100元，亦有最低時數要求，一個月需約1萬蚊，比較後就決定自行請保母，又透露現時已有幾十人致電表示有意應徵。