中國三大男高音港獻唱賀回歸

【明報專訊】由中國著名男高音歌唱家莫華倫、戴玉強同魏松組成嘅「中國三大男高音」不時巡迴演出，下星期一（8號）晚就會喺香港文化中心舉行音樂會，呢個音樂會由香港北京交流協進會主席施榮懷及東華三院主席李鋈麟贊助，當中兩人贊助超過300個東華三院學生欣賞音樂會，希望提升學生對聲樂藝術嘅認識同鑑賞力。


由於都係慶祝回歸20周年活動之一，音樂會嘅曲目，唔少大家都耳熟能詳，好似《獅子山下》、回歸10周年時主題曲《香港始終有你》等。


今次活動由香港歌劇院同香港北京交流協進會合辦，施榮懷同Emily講，今次活動部分贊助嘅收益，會撥捐東華三院支持各項醫療、教育及社會服務等慈善工作，佢話京港交流協進會為音樂會包底，而3位男高音只係象徵式收報酬。


既然係回歸活動，施榮懷話希望今次唱吓香港嘅歌，觀眾亦聽得投入。佢透露音樂會1600張門券搶手，全國政協副主席董建華、候任特首林鄭月娥等亦答應出席。不過呢次音樂會嘅門票無公開發售，一般市民今次就無機會欣賞喇。


除咗呢個音樂會，施榮懷話，莫華倫本周四（4號）亦會去到東華三院黃笏南中學同學生交流。