阿里伙數碼港等辦創業比賽

【明報專訊】阿里巴巴在港動作多多，兩年前設立香港創業者基金仲唔止，家基金又撥出300萬美元，聯同數碼港、香港科技園合辦創業比賽JUMPSTARTER 2017，最終勝出嘅3家初創企業將分別獲得最高100萬美元投資。參賽公司業務喺香港或者打算進軍香港都得，比起申請創業者基金寬鬆少少。
阿里香港創業者基金迄今投資咗唔少初創企業，包括港人熟知嘅「日日煮」，而原來年初都投資咗科大生創辦嘅智能指環公司Origami Labs，投資公司數目增至7家，基金總幹事周駱美琪表示，基金一路有投資，只係唔會次次都有公布。
倘馬雲參賽 蔡崇信：唔保證贏
阿里巴巴副主席蔡崇信亦有到場，被問到如果多年前嘅馬雲參賽會唔會贏硬？蔡崇信就笑住咁話：「我唔敢保證！」佢又話馬雲嘅創業諗法應該唔係最突出，但勝在有激情同堅持下去嘅毅力。嘩，真係好老實。至於被問到有傳馬雲被禁止出境時，蔡崇信就以一句「No」否認傳聞。
email: piano@mingpao.com
[小琴密語]