嫻姐諷「$」係港鐵新標誌

【明報專訊】工聯會榮譽會長陳婉嫻退下立法會後未有因此「收火」，面對唔滿意嘅事，照樣狠批，噚日佢就喺報章專欄批評港鐵，直指港鐵「為了錢而瘋狂」，仲話如果要為港鐵二次創作一個新標誌，相信會變成「$」，諷刺港鐵「賺到盡」、成為港人心目中嘅「吸血鬼」。


指港鐵站在必贏位置

嫻姐噚日喺《am730》嘅專欄指出，港鐵受惠於政府傾斜嘅交通政策、站在「必贏」位置，由香港人一手一腳「養大」，過去每年都年賺百億，但就聲稱因轄下機鐵賺唔到錢，所以計劃加價，直指港鐵係「不顧公義的機構，絕不配成為香港引以為傲的機構，而是欺壓港人的老虎」。


嫻姐批評「港鐵無情的加價，已成為了其公司的標誌之一。以後，當大眾談起它，除了擠迫、事故、延誤之外，大家還會記起它的冷漠」。佢又話港鐵雖然受到眾多批評，但都係唔會回心轉意，「因為當一個機構或一個人為了錢而瘋狂，任何的批評和反對聲音，都會被視為惡意的！」