10年銀行IT人 為轉行讀鐵路課程

【明報專訊】去年底開幕嘅港鐵學院提供模擬駕駛等各類型鐵路課程，第一屆鐵路工程高等文憑課程就錄取咗32人，吸引咗想轉工嘅人，亦有想自我增值嘅現職港鐵員工，呢個課程今年6月再招生，預計9月開學。


兩年兼讀制 6月再招生

呢個兼讀制課程為期兩年，今年1月已開課，教授鐵路工程基本知識同技能，第一年要修讀9個核心科目，第二年學生就根據成績，喺配電、信號及通訊、軌道、鐵道車輛4個特定科目選修一個科目。喺銀行從事資訊科技工作近10年、34歲嘅陳光宗（圖右），為咗轉工亦唔怕辛苦，每星期兩日放工後去上堂，希望將來從事鐵路通訊、付費、計算流量等系統嘅工作。


學生中有港鐵員工，曾任車長、現職車廠營運主任嘅林卓明（圖左），負責喺車廠調配列車，佢話因為唔係讀機械工程出身，調職後先發現唔夠知識，於是想自我增值，認識供電同信號系統等知識。


港鐵學院校長張少華話港鐵、承辦商或相關公司都需要人才加入，畢業生都有機會獲聘做初級工程師或技術員，學院至今有超過200人次報讀短期課程。