馬拉松審議迪士尼擴建撥款 葉劉撐朱凱廸休會動議

【明報專訊】立法會財委會馬拉松式開會，審議迪士尼樂園54.5億元擴建撥款申請，議員朱凱廸喺噚日會上提出休會動議，話建制派議員田北辰都反對撥款申請，咁應該畀多啲時間議員考慮。平時泛民議員提出休會動議，建制派一定會反對，但新民黨主席葉劉淑儀噚日都支持休會，係建制派唯一一個「倒戈」議員。但係休會動議最終都係被否決。


葉劉要求列明屬最後撥款

不過，葉劉其實係支持撥款，佢喺會上話，唔應該事後孔明話政府同迪士尼嘅協議係不平等，當年香港需要同新加坡競爭，爭取迪士尼落戶香港。葉太贊成撥款，但佢就好似朱凱廸等議員咁，運用財會議事規則第21段提出動議，要求撥款之餘加入附加條件，包括今次係最後一次撥款，如果樂園唔可以喺今次擴建後轉虧為盈，政府就要同迪士尼重新磋商。不過，葉太無跟足規程喺開會前兩日提交，所以動議攞唔到批准。


田北辰：再注資樂園 喪權辱港

至於反對撥款申請嘅田北辰無支持休會，話財會仲有好多其他事項要審議，但佢覺得注資迪士尼協議係「喪權辱港」，呼籲議員否決方案。


政府非常緊張今次嘅撥款申請，噚日嚴陣以待，派出大批政務主任「狗仔隊」，核對議員出入人數，唔希望需要投票表決時唔夠人支持搞到「甩轆」。財會今日會繼續馬拉松式開會，相信仲要討論多幾粒鐘先有機會表決。