石禮謙孭92蚊潮袋

【明報專訊】唔好以為年紀大就一定追唔上年輕人潮流，72歲嘅經民聯立法會議員石禮謙一樣「與時並進」，佢呢次隨團視察粵港澳大灣區，就孭咗個好潮嘅紅色背囊，十足學生哥咁款，喺人群中認真搶眼。
原來呢個「書包」係佢兩年前親自喺深水埗選購，盛惠92蚊，仲陪佢征戰過唔少地方，包括中東以色列。石禮謙就透露，追溯番上一次自己孭背囊已經係細個童子軍時，笑言孭番個紅色潮包都令到自己心態後生啲。