大灣區考察團「加行程」 林健鋒帶高官佛山「夜蒲」

【明報專訊】特首梁振英（CY）率領嘅粵港澳大灣區考察團，一連3日行程都好緊密，不過一班團員都無放過夜晚休息時間，自行加插「行程」。話說佢哋第一晚（前日周三）住喺佛山，本身係佛山南海人嘅經民聯林健鋒，就拉大隊帶埋一班高官同團友，好似財政司長陳茂波、政制及內地事務局長譚志源、民建聯葉國謙、經民聯石禮謙等，深入當地好出名嘅「蒲點」嶺南新天地，又食又玩。


歎雙皮奶菠蘿油 參觀中藥舖

嶺南新天地係佛山近年保育活化嘅新綜合商業區，入面有唔少具嶺南特色嘅歷史建築物。有地頭蟲林健鋒帶路，當然招呼周到，佢安排咗好多美食，例如雙皮奶、菠蘿油、雞蛋仔等，相信兩地口味應該都唔會差得好遠。


佢哋之後去咗當地一間好出名嘅傳統藥材舖，財政司長陳茂波就忍唔住拎起個秤扮吓中醫。呢間藥舖仲有段古，當年晚清重臣李鴻章途徑佛山，咁啱太太肚痛，服用咗呢間藥舖嘅秘方就無事，事後送咗塊牌匾，久而久之呢間藥舖就聲名大噪。其實立法會經民聯議員之前都想搞個旅行團，帶議員返佛山行吓，最後無疾而終。今次趁機成行，唔知算唔算還咗林健鋒一個心願呢。