新民黨下月黨慶 葉劉用競選辦信紙邀選委

【明報專訊】特首選舉塵埃落定，曾參選但未能取得足夠提名「入閘」嘅新民黨主席葉劉淑儀，近日就向選委發出邀請信，出席該黨5月舉行嘅黨慶，都仲係用葉太競選辦信紙。


資訊科技界選委方保僑噚日喺facebook上載收到葉太嘅邀請信，但表明「道不同不相為謀」，唔會應邀出席，似乎資訊科技界有選委對葉太意見都幾大。


葉太喺信中話，希望再次把握機會向選委表達謝意，又話佢喺選舉中獲益良多，其中最重要嘅係爭取提名時接觸到社會唔同界別、階層、政治立場嘅人，既聆聽對方訴求，亦解釋自己嘅想法同理念，希望收窄分歧。


葉太形容，佢選戰後無停下腳步，隨即重新投入立法會工作，又同唔同組織見面為市民發聲。而佢另一項重要工作就係帶領新民黨發展，該黨會喺5月12日舉行6周年黨慶酒會，希望大家出席咁話。