東江睇水團 副團長鬧雙胞

【明報專訊】立法會下周五及六會組團去廣東考察東江水，有19個議員參加，而參加者噚日開個「茶會」簡介行程，團長劉業強竟然無出席，據聞係陪阿仔去英國。會議期間民建聯梁志祥就善意提出，交流團咁多人，不如搵個副團長幫下手，但搵邊個做呢？結果，副團長就鬧出雙胞胎，由民主黨黃碧雲同經民聯盧偉國一齊做。


事緣志祥哥提出建議之後，黃碧雲就當仁不讓自薦做副團長，而在場嘅陳健波見到咁，就話盧偉國係工程師，可能比較適合，結果大家都頭痛揀邊個先啱，最後都係以和為貴，齊齊做副團長。


今次係本屆立法會首次有跨黨派議員到內地考察，唔少傳媒都想去採訪，但據聞發展局官員唔知怕乜嘢，喺會上話未必安排到，但今次其實係議員北上，唔係官員外訪活動，所以黃碧雲等人都要求立法會秘書處返去盡量安排，睇吓可唔可以安排到記者到場採訪。