羅永聰：阿sir無興趣組黨

【明報專訊】特首選戰落幕，有唔少「薯粉」網民都話希望前財政司長曾俊華可組黨參政，甚至建議阿sir參加日後嘅立法會補選。前曾俊華競選辦成員羅永聰話，阿sir「應該無呢個興趣（組黨）」，仲講地區政治同直選始終都係現有政黨嘅專長。


羅永聰噚日接受民主黨前主席劉慧卿節目《議會內外》訪問，阿聰話候任特首林鄭月娥至今都無搵佢組班，但感謝林太嘅賞識。


卿姐就話，有建制派人士對佢講，應該搵羅永聰做新聞統籌專員（IC）。阿聰話IC同特首要緊密合作，又指係需要一種「夾」嘅運氣，佢話自己同阿sir「夾」，因為有信任同空間，而且做嘅事合阿sir心意。阿聰指林太同阿sir做事風格唔同，「我唔敢答係唔係夾（到）」。


卿姐亦有問曾俊華「會不會組『薯仔黨』」，阿聰話「佢應該無呢個興趣」。至於會唔會組黨參與選舉，阿聰講明「我都唔敢用呢種形式參與，始終地區政治、直選係你哋嘅專長」。另外，阿聰仲話特首選舉後多咗市民認識佢，有市民會喺街上同佢握手，有次佢同太太去消夜食糖水，仲有市民幫佢埋單。