民主思路麥嘉晉：台政界不解「北京唔信曾俊華」

【明報專訊】民主思路目前正喺台北交流，已經拜訪咗立法院、海基會同陸委會等機構。理事麥嘉晉同Emily講，當地政界好緊貼本港早前特首選舉嘅消息，仲好關注選舉過程，例如好想知點解北京對曾俊華唔信任。


民主思路應台灣中華港澳之友協會邀請去台北訪問交流，第一站拜訪立法院副院長蔡其昌，麥嘉晉話，台灣嘅選舉發展歷程，由激進逐漸走向中間溫和，直到近年「時代力量」崛起，呢啲轉變對香港嘅選舉政治非常有參考價值。而當地選舉策略、傳訊同動員力等都值得香港學習。


麥嘉晉話當地政界人士好留意特首選舉，非常了解整個過程，而佢哋都有兩個疑問，就係好想知點解北京對曾俊華唔信任，以及點解曾俊華明知無中央支持都堅持參選。麥嘉晉話今日佢哋會去政治大學交流，了解台灣人與中國人身分認同嘅研究結果，相信對香港而言會好有參考價值。