蔣麗芸倡18區滅鼠賽 「香港可能有8000萬隻老鼠」

【明報專訊】噚日立法會特別財委會討論政府開支預算，唔少議員都關注鼠患。民建聯蔣麗芸語出驚人，話香港800萬人口，老鼠可能都有8000萬隻，而因為老鼠繁殖好快，一胎生好多隻，佢試過黃昏時間喺街見到個位似有老鼠，搵嚿石仔掟過去，啲老鼠即刻走晒出嚟。佢話特別時期要用特別方法，不如搞番個「十八區滅鼠大行動」，邊區捉得最多老鼠就係冠軍，畀啲鼓勵喎。


倡流浪貓守後巷監察

鼠患當然唔只係九龍西嘅問題，蔣議員講到全港九新界嘅地下都係老鼠嘅活動範圍時，主持緊財委會嘅新界西議員、新民黨田北辰亦忍唔住關心吓，「深水埗嗰啲係咪好似元朗咁大隻，好似貓咁？」蔣議員回應話「我無度過呀主席」。


提到治鼠，蔣議員又話「有無啲咩辦法，我哋唔好殺啲（流浪）貓，然後啲貓擺佢哋喺後巷度監察……」。香港有無8000萬隻老鼠真係無法fact check，但根據統計處資料，肯肯定香港無800萬人口咁多，去到2016年底都只係得737萬。食物及衛生局長高永文聽到蔣議員咁特別嘅建議，都保持禮貌，話會返去考慮吓呢個比較有創意嘅方法。蔣麗芸聽完局長咁講似乎好滿意，笑到四萬咁口。


高永文話，若收到市民反映鼠患，就會派流動小隊去現場滅鼠，更重要係預防工作，例如加強市民環境衛生意識，同時加強執法。佢話有啲措施未必只針對老鼠，但其中一個效果就希望幫到防治鼠患，例如喺垃圾黑點安裝網絡攝錄機嘅先導計劃，初步成效唔錯。


食環署長劉利群話，5月至6月會檢討先導計劃成效，有機會擴展到其他地區。