葉太繼續活躍 匯賢公布香港競爭力研究

【明報專訊】新民黨主席葉劉淑儀雖然喺特首選舉中再度無法入閘，但佢仍然好活躍，由佢創辦嘅匯賢智庫噚日公布歷時兩年完成嘅《香港長遠競爭力研究》，由嶺南大學教授何濼生負責發表。


報告就香港稅制、經濟、土地、勞工及軟實力等多方面分析，並提出多項意見。何濼生話香港競爭力危機源於凝聚力不足，社會不停內耗，更提醒下任政府想得到市民信任，要學識易地而處，並要跟足程序辦事，千祈唔可以偏離，唔知係咪對候任特首林鄭月娥嘅建議？


沈運龍趕唔切投票

今次發布會，嘉賓仲包括早前提名葉太嘅工業界（二）選委、廠商會會董沈運龍（圖），佢自爆3月26日特首選舉無去投票，事關身在歐洲出席巴塞爾鐘表珠寶展。唔通佢係透過唔投票表達不滿？


佢就同Emily解釋，其實機票一早買好，只不過當地工作太困身，最後都無法回港，強調如果返到香港，都會跟廠商會推薦投番畀林鄭月娥。