林鄭找數見前線記者

【明報專訊】候任特首林鄭月娥喺當選日講過，上任後希望盡快同前線記者見面深談，聆聽前線記者關注嘅事情。噚日林太就「找數」，同20幾個前線記者，以及記者協會代表會面兩個鐘，了解前線記者嘅工作情况。


記協﹕承諾傳媒政策有新風格

記協喺會後發聲明，指林太承諾新一屆政府喺傳媒政策方面將展示新風格。記協話希望林太可以做到，畀市民同傳媒睇到政府，以及新任特首改革嘅決心。


記協總結會上前線記者關注議題，當中包括希望來屆政府盡快落實《資訊自由法》同《檔案法》，以及冀來屆政府可豁免新聞機構查冊費用。同時，亦有記者反映希望可開放網媒採訪，同重開政府總部東翼，方便記者採訪。唔少記者都要求政府盡量以開放態度，用記者會形式交代政策。


另一方面，前線記者都關注新聞工作者喺香港同內地採訪嘅人身安全問題，亦有記者反映香港記者薪酬待遇多年來普遍偏低，入行前景暗淡。