張華峰望陳家強有得留低

【明報專訊】候任特首林鄭月娥上任前已提出財金系統官員「大換血」，外界關注財爺陳茂波、財經事務及庫務局長陳家強有無得留低。雖然金融服務界議員張華峰之前都鬧過陳家強做嘢「hea」咗少少，原來佢都幾唔捨得陳家強走。


肥老闆噚日同傳媒茶敘時就幫對方講吓好說話，評價佢表現「不過不失」，起碼肯聽業界意見，又話金融市場瞬息萬變，對方做事思維比較平穩，起碼「唔冒進」。肥老闆提醒林太，財金系統要留番一啲班底，否則會搞得混亂。


至於財爺人選，就傳出匯豐亞太區行政總裁王冬勝呢個名，肥老闆覺得，外資銀行出身無問題，舉例當年梁錦松都係外企出身，曾俊華亦係前港督彭定康秘書，同樣獲得中央信任。咁啱啱升任嘅陳茂波咪無得留低？肥老闆直言，如果無人肯做，咁就陳茂波啦，似乎喺佢心水名單中，波哥只係排最尾喎。