李慧詩晚晚攬海龜公仔瞓覺 賽前聽農夫《456Wing》減壓

【明報專訊】因海龜寓意艱苦後奔向自由

5年前勇奪奧運銅牌嘅「牛下女車神」李慧詩（Sarah）多年嚟咬緊牙關，踩過一場又一場國際賽事，卸下戰衣嘅佢其實都係一個尋常鄰家女孩。Sarah近日接受馬會《駿步人生》刊物訪問，透露小秘密，原來佢平時會攬住海龜毛公仔瞓覺，而佢鍾意海龜係因為海龜出世後要有堅強意志面對艱苦環境，但踏出大海後奔向嘅自由，係佢好嚮往嘅感覺。


訪問當日，Sarah右拇指塗上藍色指甲油，圖案係香港區旗。佢坦承平時訓練到好攰，打扮比較求其，但出街都會打扮吓，得閒都會搽指甲油、化妝同睇雜誌買新衫，生活同一般女仔無咩分別。長年離鄉別井訓練同比賽，背負住港人期望嘅Sarah，平時又點減壓？原來Sarah每次出賽前都會聽本地組合農夫首《456Wing》，鼓勵自己堅持落去，佢欣賞農夫嘅歌曲唔只講愛情，仲會觸及社會議題。


自小欣賞謝霆鋒

近日憑住廚藝節目成為網上熱話嘅藝人謝霆鋒，原來係Sarah自小就好欣賞嘅偶像。喺Sarah眼中，謝霆鋒雖然有時反叛，但最終創出一番事業。Sarah仲有感而發話，唔係每個人都完美，寄語大家要喺錯誤中學習同調校，再向更高嘅目標進發。