匯豐推流動保安編碼

【明報專訊】騙徒行騙手法層出不窮，銀行戶口網上保安真係好重要，雖然話除咗個人密碼之外，銀行都會畀多個保安編碼器你作為雙重保障，但變相好似唔多方便，好似早兩日小琴臨時要轉帳，本來諗住上網搞掂，點知先醒起無帶編碼器，附近又無ATM，搞到好頭痕。
出街唔使再帶編碼器
不過呢個問題終於可以好快解決，事關匯豐下個月初會推出流動保安編碼新服務。聽佢哋講，流動保安編碼程式會內置響手機內，客戶直接利用電話就能夠收到保安編碼，即係以後都唔駛再帶住個編碼器。
除此之外，匯豐仲推出另一個新功能，就係利用指紋認證直接以指紋登入匯豐理財應用程式，簡單講就好似iPhone咁用指紋取消待機狀態，而匯豐呢項新功能暫時只有蘋果裝置用戶可以使用，不過Android用戶都唔駛擔心，因為Android裝置嘅指紋認證功能亦會好快推出。
[小琴密語]