政府部門用水 康文署最多

【明報專訊】過去政府推動「惜水」文化，但似乎有啲政府部門冇牽頭帶動。Emily留意到水務署回覆立法會財務委員會時候，披露咗2016年十大用水量最高嘅部門（見表），首3位分別係康文署、懲教署同食環署，其中康文署嘅用水量達1251萬平方米；十大部門喺舊年嘅總用水量達2855萬立方米，大約等於1.4萬個標準泳池嘅容量。


水務署：難推論節約用水表現

水務署話，一般政府部門嘅用水量係取決於多種因素，例如公眾設施嘅使用人數同使用率等，好難單憑年度嘅總用水量評估部門節約用水表現，其實舊年嘅總用水量已經比前年少咗3%。Emily睇番康文署轄下嘅公眾設施，包括泳池、公園等，其實唔少都要用水，唔怪得喺各個部門之中用水最多。


水務署又話喺今個財政年度，會繼續向康文署同食環署提供技術意見，落實用水效益最佳實務指引，其實2009年12月開始，已經為超過5萬個水龍頭、淋浴花灑、冲廁水箱等嘅用水設備換過晒節水用具，希望可以進一步「惜水」。