fb建功 蘇格蘭有心人4日找到港情侶

【明報專訊】facebook大神嘅力量可以有幾大呢？來自蘇格蘭嘅女士Eve早前喺英國倫敦眼摩天輪上，為一對陌生情侶影咗張相，仲話情侶當時向自己揮手，感覺好友善。其後因為人群擠迫，畀唔番張相對情侶。Eve於是將相放上fb「尋人」，結果花咗4日就搵到相中嘅香港情侶。


Eve今個月25日喺fb貼出嗰張情侶合照，「（fb尋人）可能無用，但我覺得我必須試吓」。截至噚晚7點，帖文獲得超過800個分享，有國際網民留言話已經分享咗去自己地區，當然唔少得香港啦。


情侶嘅身分終於喺噚日朝早揭盅，原來係一對來自香港嘅情侶，佢哋噚日喺帖文留言話好多謝Eve，又話Eve非常貼心，令佢哋喜出望外；Eve亦話今次嘅尋人經歷好難忘，亦再次見證到網絡嘅力量。