電容巴士啟用 當沙田加班車

【明報專訊】政府資助九巴訂購8部由中國製造嘅單層超級電容巴士，喺經過超過一年測試後，噚日有兩部正式啟用載客，行駛來往沙田市中心至濱景花園嘅284號循環線，每次最多可載72人。


九巴話，電容巴士會先喺車廠叉滿電，當到達沙田市中心巴士總站後，電容巴士可透過車頂上嘅集電弓，喺總站嘅充電系統叉電，每次大約叉幾分鐘。九巴又話，今次兩部電容巴士係以加班車形式行走284線，屬首階段計劃，第二階段會安排4部電容巴士，代替目前兩部雙層巴士行走284線，到時284線早上繁忙時間嘅班次會由8分鐘加密到6分鐘。