調查：青年會計師多單身

【明報專訊】青年專業聯盟噚日發布一個關於青年會計師最關注議題嘅調查結果，發現90%願意透露感情狀况嘅受訪者中，有七成都係單身。聯盟話未來要搞多啲聯誼活動，例如速配約會（speed dating），擴闊吓專業人士嘅社交圈子。


最關心民生 政治最少

調查於9月至10月喺互聯網進行，調查對象係年齡40歲或以下嘅香港會計師，一共發出3112份問卷，回應受訪者共300人。聯盟指出，調查結果反映青年會計師最關心民生問題（62%），其次係經濟問題（24%）。最少人關心嘅就係政治議題，只有2%受訪者表示有興趣。


聯盟話，喺眾多民生問題上，96%受訪者最關心房屋土地問題，又話有70%受訪者願意透露居住房屋種類，當中只有23%人居於自置物業，反映現時有大部分青年會計人員因樓價高企而無法「上樓」。聯盟鼓勵青年會計師多關心同參與政治，仲話日後會收集會員意見，定期約見官員同立法會議員反映。