有話說﹕精明選擇遊戲治療服務

【明報專訊】Mama最近睇到單新聞，就講有家長替兒子搵遊戲治療服務時畀人搵笨。


話說嗰位家長，一直懷疑10歲囝囝行為情緒有問題，等緊政府排期做評估時，亦同時搵遊戲治療師幫手。經朋友介紹下，搵到一位自稱「心理輔導」課程導師、屬「英國遊戲治療協會」（Play Therapy United Kingdom, PTUK）認可嘅女遊戲治療師幫忙。不過，好奇怪，佢第一次跟家長做諮詢時，竟然喺公共場所進行，而且效率奇高，10分鐘就搞掂，之後就話佢囝囝要上10節遊戲治療。


雖然要成萬二蚊，但為咗囝囝，幾貴都要啦！往後10節，每次遊戲治療師都帶小朋友喺中文大學游走，有時又坐公園，從來冇試過喺室內遊戲室會面。而近日，傳媒就踢爆，原來呢位遊戲治療師已經被PTUK暫停會員資格！


近年，坊間有好多機構聲稱可提供遊戲治療服務。嚴格來講，佢哋只係運用緊遊戲治療嘅方法去幫助小朋友，但提供服務嘅人，就未必有註冊喇！


註冊社工暨註冊遊戲治療師李秀英（Nell）話，香港未有遊戲治療師註冊或發牌制度，要成為註冊遊戲治療師，就要喺海外認可機構註冊，包括美國、加拿大、英國、澳洲等地，想知從事遊戲治療工作嘅人究竟有冇註冊？咁就要登入相關認證機關網頁查一查。


註冊遊戲治療師需經嚴格考核

Mama私底下亦向多位註冊遊戲治療師八過，行內都公認由美國遊戲治療協會（Association for Play Therapy, APT）發出嘅註冊證明最具代表性，因為要求好嚴格，全港暫時只得30人有呢個註冊證明。身為其中之一嘅Nell指，美國方面，規定申請人已具備從事精神健康工作嘅專業資格，包括係註冊社工、註冊心理學家、註冊精神科醫生等，再透過連串訓練、實習和督導，先可以喺原先專業範疇之下，附加上註冊遊戲治療師嘅名銜。


佢又話，註冊遊戲治療師應該識得點樣保障家長及小朋友嘅私隱，所以冇可能會喺公眾地方做諮詢；加上遇到新個案，往往要花較長時間去了解家長及小朋友嘅背景、佢哋所面對嘅困難和需要，釐清目標，一般都要個半鐘至兩個鐘。


至於喺戶外做遊戲治療，Nell就話要視乎情况，唔可以話一定唔得，要睇目的。收費方面，私人執業嘅註冊遊戲治療師，平均每節收費介乎700至800元；而資歷更深嘅「註冊遊戲治療師督導」，則介乎900至1000元。